محمد اسماعيل - القاهرة - كتبت- نهى خورشيد

قليلاً ما يجمع الحب بين اثنين لديهم ميول وانتماءات مختلفة، ومن هذه الحكايات قصة حب خالد الغندور نجم الزمالك ومنتخب مصر الأسبق، وزوجته المذيعة دينا سليم.

ورغم أن الغندور يعتبر من أشهر لاعبي الفارس الأبيض في جيل التاسعينات، وانتمائه الشديد للقلعة البيضاء، إلا أنه وقع في حب دينا "الأهلاوية المتعصبة".

وتزوج الثنائي، وأنجبت دينا طفلين من خالد الغندور وهما مروان وزينه.

وحكي الغندور عن بداية تعرفه على دينا في تصريحات سابقة :"قصتنا، كنت في أحد الأماكن كدا وكنا في رمضان، ودينا كانت مذيعة في قناة في دبي بتسجل شغل ليها من مصر، فهى عملت معايا حوار".

وأضاف نجم الزمالك السابق:"بعدها اتعرفت عليها، وهي بصراحة كلها عاجبتني، وسألتها ممكن اخد رقمك علشان لما الحلقة تنزل تعرفيني المعاد، هي مكانتش تعرف مين خالد الغندور، ولا كان ليها فى الكرة نهائي".

كما قالت دينا:"صحابي كانوا بيقولولي أنتي بتهزري يعني ايه مش عارفه الكابتن خالد الغندور، انا عارفه أنى في الكرة مش شاطرة، وكنت لسه في بداية شغلي".

وتابعت حديثها :"سألت صحابي وقتها ايه المهم فيا يعني علشان يتابع الحلقة بتاعتي، هما قالوا هو أصلا بيطلع في مليون برنامج، فأكيد هو مش متهم بالحلقة'.

فيما كشف الغندور عن سبب تأجيل زواجهما :"علاقتنا بدأت بصداقة وكنا بنخرج كجروب مع صحابنا، والصدف جمعتنا كتير، وأنا في الأول كنت متردد في فكرة اني ارتبط، فاخدت سنة سنة ونص لحد ما أخدت القرار واتجوزنا".

وعن شخصيتهم داخل المنزل قالت دينا:"خالد في الاستوديو جد جداً، إنما في البيت هو مش كدا خالص، هو دمه خفيف جداً فى البيت، لما يكون في دوشة وحاجات صوتها عالى أعرفي أن هو في البيت".

ليرد الغندور عليها:"أهم حاجه عندها النظافة، وبتموت في الاغاني الفرنساوي القديمة وهي مش فاهمه منها حاجه".

كما واصلت :" playlist بتاعتي كلها أغاني فرنساوي، وبقوله ترجملي الحتة دي مش فاهمه حاجة، علشان هو كان بيدرس فرنساوي".

وأتم الغندور حديثه:"هي حببتني في الموسيقي، وخلتني أحب عمر خيرت جداً وكمان بدأت أحضر حفلات بسببها".

وعن انتمائها قالت:" أنا أهلاوية متعصبة وخالى هو سبب انتمائي، الناس لقيتني بملكة التوقعات، بعد توقعي فوز الأهلي على الهلال السوداني، ووقوع الأحمر مع الرجاء البيضاوي في مجموعة واحدة ببطولة إفريقيا".